服務條款
最後更新：2026年9月8日
本條款適用於「夾啦喂」流動應用程式及 chipinlawai.com，
由 LW Group Limited（啦喂集團有限公司）提供。使用本服務即表示你接受本條款。
1. ⚠️ 本服務係記帳工具，唔係支付服務
我哋唔會經手任何金錢。夾啦喂只係幫你計數同記錄，
真金白銀係你哋自己用轉數快、PayMe 或者其他方式直接過畀對方，
完全冇經過我哋。
由此引申幾點，請務必理解：
- 我哋睇唔到任何真實銀行交易。所有「已找數」紀錄都係由付款方自行申報、
再由收款方確認。
- 我哋唔會驗證任何人填嘅收款資料（電話號碼、轉數快識別碼、PayMe 連結）。
過數之前請自己確認清楚收款人身分。
- 上載嘅入數截圖只係紀錄，唔係經我哋核實嘅憑證。
- 本 app 生成嘅轉數快 QR 只係按你輸入嘅資料編碼。掃描前請核對收款人同金額。
2. 一有人過咗數，條數就唔改得
呢個係我哋畀所有參加者嘅保證。只要有任何一個人 mark 咗「我過咗數」，
之前嗰啲數就冇人改得、刪得，連主辦人都唔例外，成個活動亦刪唔到。
道理好簡單：佢係照住「你夾 $450」呢個數過咗 $450。事後改做 $600 再問佢攞多
$150，或者改做 $300 令佢紀錄上變成過多咗，兩樣都係冤枉人。
- 仲加得新支出。有人提早過數係好平常嘅事，之後先記起「阿明買咗炭」
好正常。加新數唔會令已經過咗嗰筆變錯——佢真係過咗嗰筆錢，
呢個事實唔會變，計淨額嗰陣照樣扣返。
- 主辦人可以撳「埋單」，即係「條數就係咁多，開始過數」。
埋咗單之後連加支出、加人都唔得。
- 真係要改點算？要相關嗰兩個人先撤回嗰筆過數紀錄——
已確認嘅要收款人先撤得。即係話「拆返條數」一定要由真係郁過錢
嗰啲人自己去拆，唔係主辦人一個人話拆就拆。
- 凍結咗都仲可以：過數、確認收錢、留言、改自己嘅收款資料
（唔係嘅話換咗電話號碼就收唔到錢）。
3. 錢銀糾紛與我哋無關
用戶之間關於誰欠誰、金額多少、有冇找數嘅任何爭議，
由你哋自行解決，LW Group Limited 唔會介入，亦唔會承擔任何責任。
本 app 計算出嚟嘅數字係根據用戶輸入嘅資料得出。輸入錯誤、遺漏或者虛報，
會直接影響計算結果，責任在輸入者。
4. 你嘅帳號
- 你要透過 Apple 或 Google 帳號登入，並負責保管好嗰個帳號。
- 你要為喺你帳號下發生嘅所有活動負責。
- 你要年滿 13 歲先可以使用本服務。
5. 使用規範
使用本服務時，你唔可以：
- 虛報找數紀錄或者上載偽造嘅付款截圖
- 冒充他人，或者輸入唔屬於自己嘅收款資料
- 上載違法、侵權、騷擾性或者令人反感嘅內容（包括留言同相片）
- 用通訊錄或者活動功能滋擾他人（例如不斷將唔想參與嘅人加入活動）。
對方可以隨時喺自己嘅通訊錄封鎖你
- 用本服務進行詐騙、洗錢或者任何違法活動
- 嘗試干擾、破解或者過量存取我哋嘅系統
如發現違規，我哋可以喺唔另行通知嘅情況下暫停或終止你嘅帳號。
6. 你嘅內容
你上載嘅內容（活動、支出、留言、相片）版權屬於你。
你授權我哋為咗提供服務而儲存、顯示同傳送呢啲內容畀同一個活動嘅其他參加者。
請留意：活動主辦人可以將活動設成「公開睇得」，
咁樣任何攞到分享連結嘅人都會見到活動內容。詳見私隱政策。
7. 廣告與付費項目
- 免費版會顯示廣告。
- 你可以喺 app 內一次性購買「移除廣告」。
- 所有購買透過 App Store 或 Google Play 處理，退款須依照各平台嘅政策，
我哋無法直接處理退款。
8. 服務按現狀提供
本服務按「現狀」及「現有」基礎提供，不附帶任何明示或暗示嘅保證，
包括但不限於計算準確性、服務不中斷或者資料不遺失。
喺法律允許嘅最大範圍內，LW Group Limited 唔會就使用或無法使用本服務
而引致嘅任何直接、間接、附帶或後果性損失承擔責任，
包括但不限於金錢損失、錯誤過數或者用戶之間嘅財務糾紛。
9. 服務變更與終止
我哋可能會隨時修改、暫停或終止本服務嘅全部或部分功能。
如屬重大變更，我哋會盡可能事先通知。
你可以隨時喺 app 內刪除帳號停止使用。刪除帳號嘅具體影響見私隱政策。
10. 條款更新
本條款如有更新，我哋會喺 app 內通知，並更新本頁頂部嘅日期。
更新後繼續使用即表示接受新條款。
11. 適用法律
本條款受香港特別行政區法律管轄，並受香港法院專屬管轄。
12. 聯絡我哋
chipinlawai@lwgrouplimited.com
LW Group Limited（啦喂集團有限公司）· 香港